नजिकिँदै गरेको छठ पर्व मनाउन अवधेश यादवका परिवार नै बुधबार दिउँसोदेखि नै गाउँ फर्किने तयारी थियो।
उनीहरूको गाउँ सर्लाही चक्रघट्टा गाउँपालिका-४ सुन्दरपुर टोल हो। अवधेशका परिवार ललितपुरको टीकाथलीमा फलफूल व्यापार गरेर आफ्ना गुजारा चलाउँथे।
अवधेशको दुई भाइ, तीन छोरी र श्रीमती काठमाडौंमा बस्थे। उनकी आमा गाउँमा ज्याला मजदुरी गर्थिन्।
उनीहरू दसैंतिहारमा समेत गाउँ गएका थिएनन्। तर छठ पर्व नजिकिएसँगै उनीहरूले चिनजानका साथीहरूसँग मिलेर गाउँ फर्किने योजना बन्यो।
त्यही अनुसार अवधेशका परिवारले छठका लागि आवश्यक सामानहरू पनि किने।
बिहीबार राति १ बजेतिर टीकाथलीबाट उनीहरू सर्लाहीको लागि निस्किएको जिल्ला प्रहरी कार्यालय मकवानपुरका डिएसपी माधवप्रसाद काफ्लेले जानकारी दिए।
उनका अनुसार बिहीबार बिहान टीकाथलीबाट अवधेशसहित ७ जना घर फर्किने तयारी थियो। सवारी चालकसहित १५ जना अट्ने गाडी रिजर्भ गरेको देखिन्छ।
तर उक्त गाडीमा सिट क्षमता भन्दा बढी यात्रु भएपछि अवधेशले आफू बिहान मोटरसाइकलमा आउने भन्दै छोरी, श्रीमती र दुई भाइलाई गाडी चढाएर फर्किएको देखिन्छ।
'आफू बिहान मोटरसाइकलमा आउने भन्दै टीकाथलीबाट बिदाइको हात हल्काएका अवधेशले फेरि परिवार भेट्न पाएनन्,' डिएसपी काफ्ले भन्छन्, 'अवधेशले श्रीमती, छोरी र भाइलाई पठाएपछि सुतेर बिहान हिँड्ने बेलामा दुर्घटनामा परेको थाहा पाएको बताएका छन्।'
अवधेशले श्रीमती र भाइलाई छठ पूजाको तयारी गर्दै गर्न भनेर पठाएको बताएका छन्। तर उनीहरू न घर पुग्न पाए न छठको तयारी नै भयो।
छठको खुसी बोकेर हिँडेका उनका परिवार बिहीबार बिहान ५ बजेर ४५ मिनेटमा मकवानपुरको भिमफेदी गाउँपालिका-६ चिसापानीमा दुर्घटना पर्यो।
उक्त दुर्घटनामा अवधेशको ३५ वर्षीया गर्भवती श्रीमती पुनमदेवी यादव, १० वर्षीया जेठी छोरी अनुकुमारी यादव, ७ वर्षीया माइली छोरी दीक्षा यादव, ५ वर्षीया कान्छी छोरी दीपिका यादव, २६ वर्षीय सहोदर भाइ विकेश यादव र २४ वर्षीय सहोदर भाइ सुबोध यादवको ज्यान गुम्यो।
तर उनको डेढ वर्षका छोरा सुदीपको भने उद्धार भएको छ। साथसाथै काठमाडौंमा उपचार भइरहेको डिएसपी काफ्लेले जानकारी दिएका छन्।
'उक्त गाडीमा अवधेशको परिवारका ६ सदस्य र थप ७ जना गरेर १३ जनाले ज्यान गुमाएका छन्,' डिएसपी काफ्लेले भने, 'परिवारका ६ सदस्य गुमाएपछि अवधेशले आफूलाई सम्हाल्न सकेका छैनन्।'
उनी आफै बिरामी भएका छन्। घटनापछि विक्षिप्त बनेका उनको ब्लड प्रेसर घटेर स्वास्थ्यमा समस्या देखिएको थियो। अहिले केही सुधार भएको उनी बताउँछन्।
उनको स्वास्थ्यमा सुधार आएसँगै शवको पोस्टमर्टम प्रक्रिया अगाडि बढाइएको छ। मृतकका परिवारले क्षतिपूर्ति माग गरेसँगै एउटा छानबिन समिति बनाइएको छ।
जिल्ला सहायक प्रमुख जिल्ला अधिकारी शोषकान्त पौडेलको अध्यक्षतामा पाँच सदस्यीय छानबिन समिति गठन गरिएको छ।
छानबिन समितमा जिल्ला प्रशासन कार्यालयका प्रतिनिधि, मुद्दा शाखाका इन्स्पेक्टर, ट्राफिक इन्स्पेक्टर, इन्जिनियर लगायतका विज्ञहरू रहेका छन्। समितिले एक साताभित्र विस्तृत प्रतिवेदन बुझाउने भनिएको डिएसपी काफ्ले बताउँछन्।
'शुक्रबार छानबिन समिति गठन भएसँगै मृतक परिवारले शव बुझ्ने भएका छन्। अहिले पोस्टमर्टम भइरहेको छ,' उनले भने, 'पोस्टमर्टम सकिएसँगै आजै अन्त्येष्टि गर्ने तयारी छ।'
उक्त दुर्घटना चालकको लापर्वाही वा थकानका कारण भएको हुन सक्ने प्रहरीको प्रारम्भिक अनुसन्धानले देखाएको छ।
बुधबार साँझपखमात्र यात्रु बोकेर काठमाडौं पुगेका सवारी चालक बिहीबार बिहान १ बजेतिर नै पुन: यात्रु बोकेर फर्किएको देखिन्छ। त्यसले गर्दा निन्द्रा नपुगेर गाडी दुर्घटनामा परेको अनुमान लगाइएको डिएसपी काफ्ले बताउँछन्।
'थप छानबिन समितिले प्रतिवेदन तयार पार्छन्। त्यही अनुसारको क्षतिपूर्ति मृतक परिवारले पाउने आस छ,' उनले भने।
घटनामा एकै परिवारका धेरै सदस्यहरूले ज्यान गुमाएका कारण अवधेशको परिवारको अवस्था अत्यन्तै दयनीय बनेको छ। अवधेश र उनकी आमा मात्र बाँकी छन्।
उनको बुबा अवधेश सानै छँदा बितेको थिए। परिवार नै गुमाएपछि उनीहरूको विछिप्त छन्।
चक्रघट्टा गाउँपालिका-४ का वडाध्यक्ष फैयाज अहमदका अनुसार अवधेश ४/५ वर्षअघि मात्र छोराछोरीहरूको भविष्यका लागि काठमाडौं भित्रिएका थिए।
उनका अनुसार अवधेशले मेहनत गरेर एक भाइलाई इन्जिनियर पढाउने, अर्कोलाई आफै व्यापार गर्न लगाएका थिए।
'८ महिनाकी गर्भवती श्रीमतीको हेरचाहदेखि छोरीहरूलाई दुख सुखले हुर्काइरहेको थियो। आज उही एक्लो भयो,' वडाध्यक्ष अहमदले भने।
आफ्नै स्थानीय बितेको खबर प्राप्त हुनसाथ घटनास्थलमा पुगेर आफूले सकेको सहयोग गरिरहेको उनी बताउँछन्।
